Davao City – Naglusad na og mas lalom nga imbestigasyon ang Sasa Pnp aron matuhog ang hinungdan sa kamatayon sa usa ka senior citizen kinsa nakit-ang patay sulod sa iyang balay sa Hizon Compound, Barangay Pampanga, Lanang ning siyudad alas 12:00 gahapon sa udto.
Ang maong biktima nga si Eduardo Tan S.r, 62 anyos, buwag sa kapikas ug nagpuyo ra sab sa mao nga lugar nakahiagom na og duha ka samad pinusilan nga posibleng maoy hinungdan sa iyang kamatayon.
Nadiskubrehan sa anak nga si Eduardo Tan Jr. ang kamatayon sa biktima gumikan sa di tiaw nga kabaho gikan sa balay sa iyang amahan sanglit nagluyo lamang ang ilang mga pinuy-anan sa dapit.
Nasuta nga una nang nakapatala sa Sasa Pnp si Eduardo Jr labot sa pagkawala sa Toyota Hilux color gray ug dunay plakang TOF-972 niadtong Hunyo 14 ning kasamtangang tuig.
Giingon ni alyas Kiko kang SPO1 Alfred Noya III nga nakita niini ang sakyanan sa biktima sa may R.Castillo Agdao nga drayban ni Jun Macas kinsa Task Force Davao Driver 11:30 sa udto niadtong Hunyo 23.
Samtang si Dodong Tagle nagsulti sa imbestigador nga iya usab nakita ang Toyota nga miagi sa Damosa Lanang alas 5:00 sa hapon sa samang petsa ug adlaw.
Nasayran sa dugang pagdukiduki ni SPO 1 Noya, nasayran nga nagpatala ang biktima sa Sasa Pnp nga gikawatan siya sa iyang uyab nga si Michelle Forteza niadtong Mayo 8 ning kasamtangang tuig.
Apan gihikling sa imbistegador ang anggulo nga kawat sanglit intact ang personal nga gamit ug kwarta sa biktima dihang nakaplagan kini nga patay sulod sa iyang balay kagahapon adlawa.
Busa tanang mahinungdanong ebidensya ug mga testimonya sa mga testigo gihipos na karon sa homicide and arson section nga posibleng magtumbok sa tinuod nga motibo ug pag-ila sa suspek ugali gipatay kini.
RadyoMaN Joel Viray
