Sa interview sa DXDC RMN Davao kang Police Corporal Eduard James Pailago, personahe sa Compostela Municipal Police Station, iyang gisaysay nga gikan Davao ug padulong Baganga ang SUV nga gimaneho ni Abner Aloy, 54 anyos, taga Baganga, empleyado sa Department of Public Works and Highways (DPWH) sa Davao Oriental.
Sa imbestigasyon, samtang nagbiyahe ang sakyanan ug pag-abot sa lugar aduna matud pay miaging kabayo ug sa paglikay niini, nahagbong ang sakyanan sa pangpang nga bahin sa karsada.
“Mura’g naa daw niagi nga kabayo maoy iyang gilikayan. Okay ra man sila. Wala may samad ilang (lawas) pero na-damage lang ilang sakyanan,” matud sa pulis.
Pahimangno sa otoridad sa mga motorista nga mag-amping kanunay sa pagbiyahe ug magmatngon ilabi na sa mga hayop nga posibleng mutabok sa dalan.
RadyoMaN Kirby Manzon
