Balay tambalanan ang gidangatan sa grupo nga gikan naglingaw-lingaw sa Butanas Swimming Pool human kini sila naaksidente samtang nagbyahe pauli sa ilang pinuy-anan.
Sa gihimong makuti nga imbistigasyon sa kapulisan sa lungsod sa Sergio Osmeña, nahitabo ang maong aksidente sa may dalang Nasyunal partikular sa may Brgy. Pob. Bajo, Sergio Osmeña, Zamboanga del norte bandang 5:20PM niadtong adlawng Domingo. Usa ka pribadong sakyanan kolor gray Mitsubishi Strada nagtangag sa plaka numero ACB 4597, nga gemaneho ni PSI Oliver Boral Guibao sakop sa PNP nga naka destino sa lungsod sa Don Victoriano, Mis. Occ. Molupyo sa Purok-2B, Kalilangan, Bukidnon.
Ang maong sakyanan adunay pasahero nga 5 kabuok, gikan sa Butanas Swimming Pool Brgy Sinai, Sergio Osmeña, Zamboanga del Norte padulong pauli sa lungsod sa Donvic. Paghidangat nila sa kurbadahong bahin nahagbong ang ligid niini sa konretong dalan hinungdan nawad-an ug control ang drayber miresulta na hinuon sa pagkahulog sa pangpang.
Usa sa mga pasahero nga si Nice Pabor, taga Canibungan Dako, Clarin, Mis. Occ nakahiagom ug bun-og sa nagkadaiyang kalawasan, human kini nadala sa Sergio Osmeña Municipal Hospital gilayong gibalhin kini sa provincial hospital sa Mis. Occ.
Gipaningkamutan nga madali makuha ang sakyana kun asa anaa pa kini sa lugar nahitaboan nga maayo usab ka guba niini, dako usab ang pasalamat sa mga kauban niini tungod kay luwas lamang sila ug walay nakutloan sa kinabuhi.
