Roxas City, Capiz – Patay ang apat ka mga persona samtang duha pilason matapos nagbunggo ang isa ka salakyan sa tatlo ka puno sang lubi (niyog) sa People’s Park, Barangay Baybay, Roxas City kaina sang kaagahon.
Dead-on-arrival sang gindangat sa ospital sanday Bryan Macalintal residente sang Sitio Nipa, Barangay Culasi, Jomer Baes kag Patrick James Llave sang Barangay Tanque kag John Bert Chinggo sang Fuentes Subdivision, Roxas City.
Samtang yara naman sa malubha nga kondisyon samtang ginabulong sa ospital si Joy Felarca Gico upod sa driver nga isa ka Indian National nga ginkilala kay Happy Singh, lunsay residente sang Barangay Dolores, Dumalag, Capiz.
Suno sa report, madasig ang pagpadalagan sang nasambit nga salakyan rason nga nagbunggo ini sa tatlo ka puno sang lubi sa kurbadahon nga bahin sang karsada sa People’s Park. Nahibaluan nga nagikan sa balay-ilimnan sa city proper ang nasambit nga mga biktima antes nagpadulong sa Brgy.Baybay. kag ginapatihan nga yara sa impluwensya sang makahulubog nga ilimnon ang mga biktima.,
Nagapadayon pa ang imbestigasyon sang traffic section sang Roxas City PNP angut sa nasambit nga aksidente. Sa madumduman nga isa man ka salakyan ang naaksidente sa nasambit nga lugar sang nagligad nga bulan nga ginkamatay sang chairman sang Bayan Capiz.
*(c) Adrias Michael – FB*
