Davao City – Mokabat sa lima ka libo ka pesos ug duha ka unit sa cellphone ang nasakmit sa tulisan sa nahitabong pagpanulis sa Catalunan Grande ning siyudad.
Sa record sa Talomo PNP, giila ang biktima nga si Benjamin Gudenes Tampipi, 39 anyos, usa ka driver, salesman ug residente sa may Northern Plain, syudad sa Panabo.
Base sa report, samtang naghatod ang biktima sa iyang mga produktong ginabaligya sa usa ka tindahan sa nahisgutan nga lugar, kalit matud pa miduol ang suspek nga naka full pace helmet ug gitiunan kini sa wala pa matino nga armas ug mideklarang tulis.
Nakuha sa suspek ang kwarta ug cellphone sa biktima dayon misibat sakay sa iyang motorsiklo padulong ngadto sa Brgy. Mintal.
Sa pagsubay matud pa sa mga kapulisan sa Talomo sa pagpanguna ni PCI Ronald Lim Lao ug gipakita sa biktima ang ilang rouge gallery, gitudlo sa biktima ang hulagway sa suspek ug giila kini sa kapulisan nga si Jayward Cepe Villarba nga duna kini pending nga warrant of arrest sa kasong murder.
Posibleng misibat kining suspek gikan sa siyudad sa Panabo ug nagtago-tago na dinhi sa Davao.
Sa karon, naghimo na og manhunt charlie operation ang kapulisan ngadto sa suspek ug padayon ang ilang follow up investigation kabahin sa maong insidente.
RadyoMaN Paul Canono
