Davao City – Dili angay musalig ang gobyerno sa CPP-NPA-NDFP bisan og nagdeklara og unilateral ceasefire hilabi na nga nagsingabot ang anibersaryo sa rebeldeng pundok karong Disyembre 26 busa muhimo gyod sila og pangatake ug harassment.
Kini ang pahinumdom ni New Guardian for Freedom and Democracy National President Tito Porras sa kagamhanan nga dili magkampante kay sukad kaniadto wala mutamod sa ceasefire ang mga terorista ug padayon ang ilang atake batok sa tropa sa kagamhanan.
Nasabtan ni Porras nga nagpa-amahan lang si Pangulong Rodrigo Duterte dihang mideklara kini og ceasefire apan gibarugan niini nga mahulog gihapon nga walay pulos ang tigil putukan.
Nakadayeg si Porras kang Pangulong Duterte tungod kay nabuhat niini ang pagdeklara og all-out war ug pag-ila nga terorista ang CPP-NPA-NDF luyo sa iyang relasyon kaniadto sa mga kumunista.
Apan ang wala lamang na-uyuni sa anti-communist crusader mao ang pag-anunsiyo og tigil putukan nga unta nasayod man kuno kini nga bisan kanus-a dili kasaligan ang mga kumunista.
Miapelar ang pamuno sa New Guardian for Freedom and Democracy sa armadong kusog sa Pilipinas ug sa nasudnong kapulisan nga dili lu-agan ang pagbantay ug pag-alerto kay dili mahibaloan kanus-a mulusad og atake ang teroristang CPP-NPA-NDF bisan og dunay ceasefire ang gobyerno kanila.
Wala makapugong si Porras nga makapuna kang Pangulong Digong tungod sa pa-usab-usab nga dagan sa barugan nga human kini mikontra sa mga kumunista apan karon nagdeklara naman hinoon og ceasefire ug ang maipit mao ang mga sundalo ug kapulisan.
RadyoMaN Joel Viray
