Davao City – Ginalanataw karon sa otoridad ang ubay-ubay ka mga anggulo sa nahitabong pagpamusil sa usa ka brgy. kapitan sulod sa iyang panimalay alas-7:30 kagabii sa Prk. Avocado, Brgy. Sion, Kaputian District, Island Garden City of Samal.
Sa eklusibong pakighinabi sa DXDC RMN Davao kay Island Garden City of Samal Mayor Al David Uy, gibutyag niini nga adunay miadtong mga personahe sa National Bureau of Investigation kun NBI-XI sa incident area ug ginasuta pa ang daghang anggulo sa posibleng hinungdan sa pagpusil-patay kang Brgy. Captain Paulito ‘Jun’ Viillaceran sama sa isyu sa yuta sa Tagum, isyu sa DANECO, ug isyu pulitikal gumikan nasayran nga mudaganay og pagkakonsehal ang kapitan sa nasangpit nga syudad.
Busa gimanduan sa alkalde ang kapulisan nga mas palawman pa ang imbestigasyon sa maong insidente.
Samtang sa laing interview sa Kaputian PNP, wala pa usab silay matumbok nga motibo sa insidente ug padayon pa nila kining ginaimbestigahan.
Kahinumduman nga gisulod sa tulo ka mga wala mailhing suspek ang balay sa biktima ug namusil ug naigo ang kapitan ug body guard niining si Johnny Caro hinungdan sa kamatayon gani samdan usab ang lain pang tulo ka mga indibidwal nga naa sa balay niadtong tungora nga karon anaa na sa luwas nga kahimtang.
Dugang pa nga narekober sa crime scene ang 12 ka mga empty shells sa .45 nga pistola lakip ang tulo ka mga fired bullets.
Gani gikasubo usab sa mga residente ug silingan sa maong lugar ang nahitabo sa ilang kapitan ingon man sa nadamay nila nga mga silingan.
RadyoMaN Renz Barbarona
