Davao City – Wala pa mailhi sa kapolisan sa Island Garden City of Samal ang gituohang gichop-chop nga parte sa lawas gikan sa pusod paubos sa tiil nga napalgan nga nag-utaw-utaw alas-7:00 sa gabii niadtong adlawng Huwebes sa daplin sa dagat sa Purok 1, Barangay Catagman, Samal District.
Sa esklusibong interview sa DXDC RMN Davao ngadto kang Police Officer 1 Jhon Rey Dalaygon, imbestigador sa Samal Police Station, gisaysay niini nga gigapos ang duha ka tiilgamit ang packaging tape sa biktima ug anaa na sa pagkadugta ang lawas niini.
Sumala ni Dalaygon nga ang kaputol sa lawas nasayran nga usa ka lalaki subay sa eksaminasyon nga gilusad ni Dr. Dennis Carlo Flores, ang City Health Physician sa Samal Island.
Sa pagkakaron anaa na ang patay’ng lawas sa biktima sa Rivera Funeral Parlor sa Barangay Mambago-a ug ipailawom sa awtopsiya aron masayran kun unsa ang hinungdan sa kamatayon sa biktima.
Kahinumdoman tulo na ang napalgan nga lawas sa tawo nga gituohang gichopchop sa Samal – unang nakit-an niadtong bulan sa Hulyo ang parte sa lawas sa babae ug lalaki didto sa Brgy. Limao ug pangtulo na kining sa Barangay Catagman.
Samtang nanawagan ang kapolisan sa IGACOS ngadto sa mga residente nga nagpuyo sa maong lugar kun si kinsa ang nawalaan sa ilang membro sa pamilya diin mamahimong muadto lang sa maong punerarya.
RadyoMaN Don Pulayao
