Davao City – Gikumpirma karon sa IGACOS PNP nga anaa na sa kustodiya sa Babak PNP si Joel Nonoy, ang amahan nga midunggab-patay sa kaugalingong mga anak sa Babak, Island Garden City of Samal (IGACOS).
Sa interbyu kang PO1 Lord Oliver Bernador sa IGACOS PNP, gibutyag niini nga balhog na si Joel sa prisohan diin karong adlawa gikatakdang pasakaan og kasong multiple parricide ug frustrated parricide ang suspek.
Kahinumdoman, wala na maluwas pa ang tulo niini ka mga anak nga pulos nag-edad og 13 anyos, 11 anyos ug 7 anyos sa gidad-an nga ospital sa samal gumikan sa samad di-nunggaban.
Samtang nagpaalim pa ang ilang 4-anyos nga kamanghuran sa Southern Philippines Medical Center hangtud karong panahona.
Nahibaluan nga alas-11:00 sa kagabhi-on sa miaging semana nahitabo ang krimen sulod sa ilang panimalay sa Purok 1, Brgy. San Isidro, Babak District, IGACOS.
Migula sa imbestigasyon nga giingong ang pagbiya sa asawa niini ug away-magtiayon ang nakatukmod sa suspek aron dunggabon ang iyang mga anak gamit ang kutsilyo.
Kahinumdoman nga giibutyag ni IGACOS officer-in-charge P/Supt. Giuffeppe Geralde nga walay rekord nga daut sa prisohan kaniadto ang suspek ingon man sa pagkalambigit sa iligal nga droga.
RadyoMaN Jason Amisola
