Davao City – Nagpadayon karon ang hugot nga kampanya batok dengue sa Island Garden City of Samal (IGaCos) sa Davao del Norte.
Sa interbyu sa DXDC RMN Davao kang IGaCos Mayor Al David Uy, gibutyag niini nga nagpabiling gipailawom ang syudad sa State of Calamity tungod sa dengue fever outbreak.
Saysay ni Uy nga padayon ang ilang mga aktibidad sa pagsumpo sa maong sakit diin gikumpirma niini nga padayong nagkataas ang kaso sa dengue sa lugar diin sa pagkakaron anaa na lima ka indibidwal ang namatay sa maong balatian.
“Padayon man gihapon ang mga activities namo kontra dengue. Mao nang hangyo namo sa mga tag-balay manglimpyo gyud, dili lang mag sige’g salig sa gobyerno,” saysay ni Uy.
Sa kasamtangan, walay undang ilang kampanya pinaagi sa matag barangay ug panawagan sa publiko nga mag-amping ug kanunayng manglimpyo sa palibot labi na sa tagsa-tagsa ka mga panimalay.
RadyoMaN Kirby Manzon
