Davao City – Aminado si Island Garden City of Samal Vice Mayor Orly Amit nga nakahatag kanila og tumang kabalaka ang pagsira sa Boracay aron ipailawom kini sa rehabilitasyon sulod sa unom ka buwan.
Nagsumikad ang kamanduan ni Pres. Rodrigo Duterte nga ipasarado ang Boracay gumikan sa mga basura nga nipaingon sa dagat gikan sa mga resorts ug hugaw sa mga tawo.
Sumala ni Amit nga dili malikayan nga mubati usab sila og kaguol kay puwede sab mahitabo sa ilang isla ang gidangatan sa boracay tungod sa pagpabaya sa mga resort owners sa kinaiyahan.
Mas nagu-ol ang bise mayor sa Samal gumikan kay ang mga sakop sa DENR Central Office nakadiskubre og mga kalapasan sa mga resort owners atol sa gihimo nga inspection palibot sa isla di pa lang dugay.
Ugaling hatagan og gibug-aton ang kalapasan sa kinaiyahan basin masusama sa Boracay ang Samal nga ipasirado sab nga dakong epekto unya sa ilang torismo, sigun ni Vice Mayor Amit.
Sama sa Boracay, usa sa gisaligan sa lokal nga kagamhanan sa Samal aron makalikop og buhis mao ang dagan sa turismo sa isla.
Gibutyag ni Vice Mayor Orly, ang kaanindot sa ilang isla maoy ilang gigamit nga capital aron makaagni og mga tigpatigayon sa resort nga naghatag og daghang trabaho sa ilang katawhan.
Busa sigurado mapiangan ang panudlanan sa gobyerno sa Samal kun susamahon sa Boracay ang ilang isla tungod sa nakita nga kalapasan sa kinaiyahan sa mga resort owners.
Sa tan-aw sa opisyal nga ang mensahe nga buot ipaabot ni Pangulong Duterte alang sa tanan mao nga dili pasagdan ang kinaiyahan apan ampingan kini ug dili lang puro panapi ang hunahunaon.
Saludo si Amit sa kaisog sa pamuno-nasud kay napasira gayod niya ang Boracay taliwala sa batikos sa mga kritiko ug pagwagtang sa bilyones ka pesos nga buhis alang unta sa panudlanan sa nasud.
RadyoMaN Joel Viray
