Samaleño nanghinaut nga masolbad na ang power crisis sa isla

Davao City – Nanghinaut ang mga residente sa Island Garden City of Samal (IGaCoS) nga mahatagan na og solusyon ang ilang dugay na nga problema sa kuryente sa isla nga gidumala karon sa Northern Davao Electric Cooperative (NORDECO).

Sa interbyu sa DXDC RMN Davao kang Nanette Veloso, nagpuyo sa Samal, gisulti niini nga dako na kaayo og negatibong epekto ang power crisis sa ilang lugar ilabi na sa mga negosyante.

Dugay usab matud pa muaksyon ang kooperatiba diin gawas sa power interruptions, reklamo usab sa mga residente ang taas nga singil sa kuryente, diin ginarason ang guba nga metrohan.

“Daghan na gyud kaayo nagreklamo kay pag muadto ko sa office, the same mga reklamo sukad pa sa una. Tapos karon kini napud sige’g brown out tapos ang bill mas mudako. Praying na maayos na unta ‘ni kay purwesyo na gyud kaayo,” sulti ni Veloso.

Nasayrang miabot na sa Senado ang imbestigasyon sa dili maayong serbisyo kun performance NORDECO diin gipasalig usab sa kooperatiba nga ilang masolusyonan ang maong mga mulo sa katawhan sa Samal.

RadyoMaN Kirby Manzon