Nagsagawa ng inspeksyon ang mga tauhan ng San Carlos City Police Station, katuwang ang Bureau of Fire Protection (BFP), sa itinalagang firecracker zone sa Barangay Roxas, Pangasinan kahapon.
Ayon sa pahayag, ang aktibidad ay bahagi ng mga hakbang ng mga awtoridad upang matiyak ang kaligtasan ng publiko kaugnay ng pagbebenta at paggamit ng paputok. Layunin ng inspeksyon na masiguro na ang lahat ng nagtitinda ng paputok ay sumusunod sa umiiral na mga patakaran sa kaligtasan.
Sinuri ng mga awtoridad ang mga paninda at ang kabuuang kondisyon ng lugar upang maiwasan ang posibleng aksidente o insidente.
Binigyang-diin ng mga opisyal ang kahalagahan ng mahigpit na pagsunod sa mga safety precaution, lalo na ang pagkakaroon ng fire extinguisher at mga timba ng tubig na madaling magamit sakaling magkaroon ng sunog o hindi inaasahang pagsabog.
Ayon sa San Carlos City Police Station at BFP, ang patuloy na koordinasyon at regular na inspeksyon ay mahalaga upang mapanatili ang isang ligtas at maayos na kapaligiran para sa mga nagtitinda at sa buong komunidad, lalo na sa pagdiriwang ng Bagong Taon. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
