Ta prepara ya el pulis de Sangali el caso de murder encontra con el 40-año de edad persona quien ya mata consu compañero na tomajan na Sitio Baluno, Bunguiao del Martes tarde.
El pulis ya nombra con el suspechao como si Emilio Araneta y Atilano, soltero del mismo lugar.
Si Araneta ya mata pormedio de lancia por sinco beses con Marcelino Pajarito y Glova, 52, casao de un lugar lang tambien.
El victima ya muri donde le ya tumba despues este ya sufri sinco lanciada na cuerpo.
El pulis ya habla antede de sosede el sangrino incidente, ambos si Pajarito y Araneta ta man tomajan na un celebracion de compli-año di Cesar Aquino.
Pero cuando ya queda ya estos egual buracho, ya tene sila agarajan palabra porcausa solamente na un diutay de asunto.
Despues deste, ya larga biaje si Araneta donde pensaba si Pajarito ya bolbe ya este.
Banda maga alas 3 del tarde, ya pensa tamen si Pajarito bolbe y mientras encamino le para na diila casa pasando atras del Baluno Elementary School, derepente ya lang ya abuya si Araneta y ya empesa este lancia que lancia con Pajarito hasta ya muri le.
Si Araneta ya escapa despues del incidente.
El pulis esperansao ay planta el caso na corte masquin pa largao si Araneta este maga tiempo.
