Davao City – Dili pa makonsiderang hingpit nga luwas na ang mga estudyante kung ato nang ipatuman ang face-to-face kun physical classes diha sa mga pribado o pampublikong tulonghaan denhe sa syudad sa Davao bisan kung ubos na kita karon sa Modified General Community Quarantine (MGCQ) control status.
Sa interview sa DXDC primetime public affairs program ‘Straight to the Point,’ gipadayag ni Barangay Captain Joel Santes sa Barangay 74-A Matina Crossing nga dili pa panahon karon nga ibalik nato sa normal ang klase ilabi na kining gitawag nga physical learning gani mas maayo nga ipatuman lamang usa ang klase gamit ang gitawag nga modular mode of delivery isip usa sa tulo ka major streams kun approaches sa gitawag nga Learning Continuity Plan (LCP) nga gipatuman karon sa Department of Education (DepEd) taliwala sa COVID-19 pandemic.
Matud ni Santes, dili pa kita angay magpa-kampante sanglit dili pa man luwas ang mga tinun-an sa dihang buksan na unya ang School Year 2020-2021 karong August 24.
Kahinumdoman nga gitin-aw mismo ni Education Secretary Prof. Ma. Leonor Magtolis-Briones nga wala nay atrasay sa August 24 school reopening ug nga mag-abli gayud ang klase sa basic education sa mga public schools ‘whatever form it is’ karong sunod bulan.
Sa pikas bahin, nagtoo si Santes nga angay tun-an pag ayo sa makadaghang higayon sa tanang mga education stakeholders ang scenario nga pipila ka mga ginikanan nagdumili sa pagpatungha sa ilang mga anak sa tumang kabalaka nga wala pay igong pangdepensa karon ang atong mga estudyante batok sa makamatay nga virus.
Kahinumdoman nga adunay mga tahong ninggula nga aduna nay positibong resulta ang mga clinical trials sa mga ‘potential COVID vaccines’ didto sa China, Russia ug uban pang dagkung kanasuran.
Gani denhe sa Pilipinas, lakip sa gitun-an karon ang tawa-tawa, lagundi ug coconut virgin oil nga gilaumang makaalibyo sa gihambin nga balatian sa mga COVID-19 patients.
RadyoMan Don Pulayao
