Davao City – Nagpatigbabaw ang tawhanon nga konsiderasyon sa kasingkasing sa Hepe sa Buhangin Police Station sa mga benepisaryo sa Social Amelioration Program (SAP) nga nag-claim sa ayuda sa mga payment centers ubos sa Area of Responsibility sa Presinto 5.
Matud ni Police Major Estrello Ramiso, Buhangin PNP Chief of Police nga kanunay niyang pahimangno ngadto sa iyang mga ginsakpan ang pagpatuman sa maximum tolerance aron dili magdasok sa linya ang matag benepisyaryo nga magkuha sa ilang SAP payout sa mga payment centers sulod sa AOR sa Buhangin Police Station.
Giangkon ni Ramiso nga daghan sa mga benepisaryo ang wala nagtuman sa physical distancing apan imbes nga ilang sikupon, misabot na lamang sila sa sitwasyon konsiderahon nga kadaghanan kanila pila na ka adlaw nag-antos og pila tinukmod sa kalisod nga ilang nasinati karon.
Alang kang Ramiso, mas importante ang paghatag og tawhanon nga konsiderasyon inay nga ipiton pina-agi sa pagpreso ug pagduot og kaso kanila sukwahi ra pod kon silang mga tinugyanan sa balaud ang anaa sa kahimtang sa mga benepisaryo lagmit mao usab ang ilang mabuhat nunot sa COVID-19 crisis.
Segun ni Ramiso nga ang iya na lamang gihimo mao nga iyang gipadad-an og stick nga uway o kahoy ang iyang mga ginsakpan nga nadestino sa payment centers aron gamiton nga pangsukod sa gilay-on sa mga benepisyaryo sa ingon matuman gayod ang physical distancing sa ilang paglinya samtang magpaabot sa turno sa pagkuha sa tabang pinansiyal sa gobyerno pinaagi sa DSWD.
Hinoon bisan tuod og naghatag ang kapulisan og konsiderasyon, naghangyo gihapon ang opisyal sa SAP beneficiaries nga sila na lamang pod ang maghunahuna nga dunay quarantine nga angay sanungon sa sama sa pagsuot og facemask ug pagsunod sa physical distancing sanglit makatabang man kini aron dili sila matakdan sa makamatay nga balatian karon nga mao ang COVID-19.
RadyoMaN Joel Viray
