Personal nga nitunol ug hinabang si Special Assistant to the President nga si Bong Go sa mga nasunugan sa Barangay Ermita sa syudad sa Sugbu .
Gawas niini ang Department of Social Welfare and Development -7 nang-apod –apod ug family food pack ug relief items nga mobalor sa kinatibuk-ang kapin sa P5,000 ngadto sa 668 ka pamilya nga nasunugan sa Sitio Kawit Barangay Ermita .
Gamit ang personal nga pondo nihatag si Go ug cash assistance nga P2,000 sa matag pamilya samtang P10,000 ngadto sa pamilya nga namatyan ug tulo ka mga bata atol sa sunog .
Abagahon usab sa Department of Health ang bayranan sa ospital sa mga napaso atol sa sunog.
Sa wa pa molakaw si Go , gihatag niini ang iyang gisul-ob nga sapatos ngadto sa usa sa mga nasunugan nga si Albert Manubag , nga wa gyuy nada nga gamit atol sa sunog.
Gitataw ni Go nga way sagol pamolitika ang iyang pagtabang ngadto sa mga nasunugan tungod kay igo lang siyang nituman sa tahas ni Presidente Rodrigo Duterte sa pagsusi ug pagtabang sa mga nasunugan .
Lakip sa giduaw ni Go mao ang mga biktima sa sunog sa Barangay Tejero diin adunay nakoryentihan nga usa ka traffic enforcer , ug padayong kritikal ang kondisyon.
