Davao City – Gilauman karon sa Department of Social Welfare and Development (DSWD) Region XI nga mahuman ang pagpang apod-apod sa Social Amelioration Program (SAP) Aid sa gobyerno sa Agosto 15, 2020.
Gibutyag ni Merlinda Paragamac, Assistant Regional Director Operations sa DSWD-XI atol sa One Davao on COVID-19 Virtual Presser, ugaling dili pa makadawat hangtud Agosto 15 dili lang usab mabalaka basta nalista na kining daan isip benepisyaryo sa maong ayuda siguradong kini makadawat gihapon.
“Maningkamot ang ahensya nga mahuman og August 15. Ato ‘ning hutdon og hatag basta naa gyud ka nga officially ikaw usa ka kwalipikado nga benepisyaryo sa SAP, ihatag gyud ‘ning tanan,” saysay ni Paragamac.
Matud ni Paragamac, niadtong July gisugdan na ang direct payment distribution sa mga SAP beneficiaries sa ubang probinsya gawas sa Davao City ug ang nahibiling wala pa nahatagan ipaagi na lamang sa digital payment o sa StarPay nga usa ka financial service provider.
Subling gipahinumdom sa DSWD-XI official, maghulat sa mensaheng ipadala alang sa schedule una pa makuha ang maong ayuda.
Mamahimo usab nga makig-alayon sa DSWD Staff sa Barangay alang sa mga pangutana sa nahisgutang transaksyon.
RadyoMaN Kirby Manzon
