SARANGANI PROVINCE—Laing dungog na usab ang naangkon sa Provincial Government sa Sarangani tungod kay sa bag-uhay lang nahuman nga tinuig nga friendly competition sa SIMEX kon Simulation Exercises and Proficiency Test for Flooding, Landslide and Vehicular Accident gipahigayon sa Buayan, General Santos City nga gi-organisa sa RDRRMC kon Regional Disaster Risk Reduction and Management Council sulod sa upat (4) ka adlaw, sa pagdumala ni Office of Civil Defense Regional Director Minda Morante kauban ang DILG Region 12, gideklarang overall Number One ang SAR 117 SAVER Team (sar one-one-seven sey-ver) kon Sarangani Auxiliary Volunteer for Emergency Response sa entiro Rehiyon Dose giapilan sa baynte-sais (26) kabuok rescue teams.
Tungod sa sunod-sunod nga ikatulong kadaugan gikan tuig 2017, 2018 og karong tuiga 2019, nahimo ng Grandslam Champion ang search and rescue team sa Sarangani Provincial Government.
Duha (2) ka major awards ang nakuha sa SAVER Sarangani Team nga mao ang Best in Rescue Highline Setup og Best in CPR, samtang nabatunan sa rescue team sa munisipyo sa Tulunan, North Cotabato ang Best in Land Navigation, Best in Hailing naangkon sa lungsod sa Antipas, North Cotabato, og Best in Vehicular Accident Response ang rescue team sa Kidapawan City.
Kagahapon sa flag raising ceremony sa Kapitolyo, gipasidunggan ang SAVER Team. Laing kalampuson na usab kini sa PDRRMO Sarangani gipangunahan ni PDRRMO Action Officer Mr. Rene Punzalan ubos sa Sulong Kaligtasan program ni Governor Steve Chiongbian Solon sa pagsuporta nila Senador Manny og Congressman Ruel Pacquiao, Vice Governor Elmer De Peralta og mga board member.
(Photos: PDRRMO Sarangani)
