Davao City – Pormal nang gimando karon sa City Government dinhi ang kanselasyon sa mga aktibidad sa umaabot nga ‘83rd Araw ng Dabaw’ karong March nunot sa hulga sa 2019 novel coronavirus-acute respiratory disease ug ubang mga hulga sa atong seguridad.
Unod kini sa anunsyong giluwatan karon ni Davao City Mayor Sara Duterte-Carpio atol sa media briefing kinsa nag-ingon nga ang ‘Misa Pasasalamat’ lamang sa maong kasaulogan ang magpabiling ipahigayon karong March 1.
Matud sa mayora, tumong niini nga malikay sa mga aktibidad nga moresulta sa panagtapok sa tawo ug giklaro nga wala gihapoy confirmed case sa 2019-nCoV ARD dinhi sa Davao City.
Pipila sa mga kinaham nga aktibidad mao ang ‘Pasiugdang Pagsaulog,’ ‘Reyna Dabawenya,’ ‘Ginoong Davao,’ ‘Sayaw Pinoy,’ ‘Hudyaka,’ ‘Mutya ng Dabaw,’ ‘Pasidungog,’ ‘Araw ng Empleyado,’ ‘Parada Dabawenyo’ ug ‘Datu Bago Awards.’
Samtang dili pugson sa City Government ang pagpaundang sa planong aktibidad sa mga pribadong kumpaniya alang sa kasaulogan sa ‘Araw ng Dabaw’ apan nagpahimangno ang alkalde nga gikinahanglang motuman sila sa guidelines sa DOH-XI alang sa pagpahigayon og mass activities.
Hinuon gipaniguro sa mayora nga holiday gihapon ang March 1 ug March 16 bisan kon wala na kini mga aktibidad.
RadyoMaN Jason Amisola
