Davao City – Subling nagpahimangno si Davao City Mayor Inday Sara Duterte-Carpio sa tanang mga drivers nga dili mag-drive kung nakainom.
Sumala sa alkalde nga pakusgan sa lokal nga gobyerno ang kampanya kontra Anti-Drunk Driving ug enforcement sa tanang mga traffic law campaigns aron malikayan ang mga fatal vehicular crashes sa lungsod.
“Naghuna-huna mi nga i-intensify ang campaign sa awareness sa mga tawo nga pag naka-inom, dili gyod mu-drive, kana lang ang gusto nato na mahitabo maka-remember sila nga when they are drunk, dili gyod mogunit or mu-maneho sa sakyanan,” matud sa mayor.
Gikasubo og mayo ni Sara ang nahitabong disgrasya Biyernes sa kaadlawon sa may Romualdo Quimpo Boulevard diin duha ka kinabuhi ang nakalas.
“Nag-discuss mi unsa pa pweding mabuhat sa City Government because daku kaayo ta’g push sa atoang kapulisan nga magdakop sa overspeeding, magdakop sa drunk driving and yet makakita gihapon ta’g instances nga naay madisgrasya, mamatay tungod sa drunk driving,” segun sa mayor.
Sa report sa Davao City Police Office (DCPO), patay sa aksidente ang 27 anyos nga si Melody Ann Sotelo Ybanez ug ang fresh graduate sa kursong Bachelor in Medical Laboratory Science sa San Pedro College nga si Janilou Faye Rosales, 21 anyos human nibangga ang ilang gisakyang Mazda Sedan sa kasugat nga Metro Shuttle bus nga gimaneho ni Ricky Aban Deloso sa may Quimpo Boulevard alas 4:30 sa kaadlawon.
Samtang sumala sa mayor nga ang Vices Regulation Unit (VRU) gitahasan usab karon nga mukasa og surveillance sa tanang mga bars nga nag-operate sa lungsod aron pagsuta kung nituman ba kini liquor ban.
RadyoMaN Aimee Guinita
