Davao City – Malaumon si Davao City Mayor Sara Duterte-Carpio nga magpabilin sa Modified General Community Quarantine (MGCQ) ang dakbayan sa Davao.
Sa interbyu kaniya sa city-owned radio karong hapon (July 15, 2020), gibutyag niini nga wala pay opisyal nga anunsyo ang Inter-agency Task Force (IATF) sa mamahimong quarantine classification sa matag Local Government Unit (LGU) sa tibuok nasud.
“Wala pa tay nakuha official announcement sa IATF. Mao na ang hulaton nato,” esplikar sa mayor.
Gipasabot sa alkalde nga dili hangtud sa hangtud ipailawom ang usa ka lugar sa General Community Quarantine (GCQ) o Enhanced Community Quarantine (ECQ).
“Pataas ang atoang cases but gusto ba ta mubalik sa GCQ? Of course, dili. Gusto ba ta mubalik sa ECQ? Of course dili. Ngano man? Dili man ta pwede forever nga mag GCQ o mag ECQ. We need for people to work. We need people to do business. We need for people to move around and do their thing dinha sa open offices and business establishments,” tataw niini.
Gipasabot niini nga kinahanglan lamang nga pakusgan ang kampanya batok Coronavirus Disease 2019 (COVID-19) ug responsibilidad kini sa tanang indibidwal.
RadyoMaN Kirby Manzon
