Davao City – Padayong gipahinumdom ni Davao City Mayor Sara Duterte-Carpio sa Davaoeños ang pagsunod sa Minimum Public Health Standards batok Coronavirus Disease 2019 (COVID)-19 ug unsa pa mang variants sa maong virus.
Gisuspetsahan sa alkalde nga posibleng aduna na nay nakasulod nga Delta variant dinhi sa syudad labi na nga aduna nay natalang kaso sa Delta variant sa Cagayan de Oro City (CDO) ug padayong abri ang transportasyon sa Davao-Cagayan ug vice versa.
Gisaysay ni Mayor Sara (sa interbyu sa city-owned radio) nga dili tanang swab test dinhi sa syudad ginapadala alang sa genome sequencing sa Research Institute for Tropical Medicine (RITM) rason nga posibleng aduna nay kaso sa Delta ang syudad hinungdan nga kinahanglang ipadayon ang pagsunod sa health and safety protocols aron malikayan ang naasoy nga mas makatakod nga virus.
“Posible nga naa na ang Delta variant dinhi sa atong syudad sa Davao because dili man gud tanan nga mga swab test ginapadala for genome sequencing sa RITM. What we need to do is the same – mask, distancing, handwashing and pagpabakuna,” sulti sa alkalde.
Dugang ni Duterte-Carpio nga kinahanglan nga adunay pagpangandam ang mga ospital batok sa Delta variant sa posibilidad nga magbaton og surge o pagsutoy sa kaso sa COVID-19 sa dakbayan.
RadyoMaN Kirby Manzon
