Nanawagan karon si Davao City Mayor Sara Duterte-Carpio ngadto sa katawhang Pilipino kinsa matuod nga nagmahal sa nasud nga motindog ug alkontrahon ang mga hagit nga gisagubang karon sa entero nasud.
Sa usaka daku nga aktibidad sa bag-ong namugnang pundok nga ‘Tapang at Malasakit’ Alliance for the Philippines sa Taguig, gihagit ni Mayor Inday ang mga Pinoy nga magpakita kita ug pagtagad kun ‘malasakit’ ngadto sa tibuok nasud pinaagi sa pagalkontra sa mga dagkung suliran.
Matud sa batan-ong Duterte, ang nasud angayang maningkamot nga panalipdan ang atong panaghiusa batok niadtong buot moguba niini ug tubagon ang mga hulga dala sa droga, terorismo ug kalisud kun kawad-on nga maoy nagpalisud-lisud ug maayo sa yanong mga lungsuranon.
Gibatbat usab sa alkalde sa syudad sa Davao nga ubos sa rehimen sa iyang amahan, Pang. Rodrigo Duterte, nasaksihan sa katawhan ang dakung pagtagad niini ngadto sa pinaka-ubos nga sektor sa katilingban.
Ang ‘Tapang at Malasakit’ event giisalmotan sa ubay-ubay’ng mga personalidad sa nagkadaiyang sektor sama nila ni presidential spokesperson Underscretary Ernie Abella, Manila Mayor Joseph Estrada, Taguig Mayor Lanie Cayetano, Ilocos Gov. Imee Marcos, presidential son Sebastian ‘Baste’ Duterte ug uban pa.
RadyoMaN June Duterte
