Davao City – Subling giklaro ni Davao City Mayor Sara Duterte-Carpio nga dili pugson ang mga indibidwal nga magpabakuna panahon nga ‘available’ na ang Coronavirus Disease 2019 (COVID-19) vaccine.
Matud ni Mayor Sara, adunay target nga ‘herd immunity’ kun pagbakuna sa dakong ihap sa populasyon sa komunidad apan dili gihapon mapugos sa City Government of Davao kadtong magdumili nga mabakunahan.
“Bisan pa man og dili nato maabot ang target nato nga herd immunity, dili gihapon ‘ta pwede mopugos nga bakunahan ang isa ka tao nga mo-refuse nga mag pabakuna,” tataw sa Alkalde.
Gipasabot sa Mayor nga tungod kay boluntaryo ang vaccination program sa Pilipinas, walay penalty o silot nga ipahamtang sa mga dili magpabakuna.
Bisan pa man, gibutyag ni Duterte-Carpio nga ayha pa man muabot ang bakuna, aduna nay gina-andam nga mga materyales nga magpasabot sa publiko unsa ang COVID-19 vaccine ug benepisyo niini aron nga madasig ang nahisgutan nga magbakuna batok sa maong balatian.
RadyoMaN Kirby Manzon
