Davao City- Temporaryo una nga gipahunong ni Davao City Mayor Inday Sara Duterte-Carpio ang random drug test sa syudad aron dili makapanukad ang mga empleyado sa city government.
Ang mando gipadangat sa mayor ngadto kang City Anti-Drug Abuse Council (CADAC) head Michael Denton Aportadera.
“Gipa-stop lang nako sa atoang in-charge, sa atong point person sa City Anti-Drug Abuse Council because na-notice nako gaandam na ang mga tawo kay nag sunod-sunod na ang drug testing. So giignan nako si Mikee nga i-stop sa because nawala na ang element of surprise and then mag resume lang siya on unannounced dates na pud in the future,” segun ni Mayor Duterte.
Karong adlawa gitaktak na sa serbisyo ang tulo ka mga ‘job order employees’ human sila nag-positibo sa paggamit sa droga atol sa gikasang drug test nga gisugdan pa niadtong nilabayng bulan ngadto sa kapin usa ka libo nga mga government employees.
“Duna tay tulo kabuok nga mga job order nga contracts under sa city government nga nag positive sa random drug testing nato under sila sa City Traffic Office. Pag gawas sa results nila immediately gi-terminate ang ilang contracts as job order,” dugang sa Mayor.
Gitataw ni Mayor Inday nga ilang tinoon unsay tukmang silot alang niadtong mga ‘plantilla employees’ nga mapalgan nga positibo sa drug use.
RadyoMan Aimee Guinita
