Kun nahimong presidente si Corazon Cojuangco Aquino nga usa ka housewife lamang ug walay pupaigong kasinatian sa pagpadagan sa usaka local government unit, nganong dili man mamahimo si Davao City Mayor Sara Duterte-Carpio?
Kini maoy argumento karon ni Presidential Legal Counsel Salvador Panelo atol sa usa ka media interview agig reaksyon sa pahayag mismo ni Pres. Rodrigo Duterte nga buot niya nga si Inday Sara maoy mamahimo niyang manununod kun ‘successor.’
Niadtong Biernes sa gabii sa Matina Enclaves dinhi sa Davao City, gipamahayag sa pamuno-nasud nga wala siyay nakitang mamahimong mosunod kaniya sa tuig 2022.
“I couldn’t find any other better candidate than Sara to become the next president. And one thing about her is she is not a bigot,” segun sa personal nga opinyon sa pangulo.
Apan karon pa lamang, natawo na usab gilayon ang kontra-balanseng narrative nga dili como anointed sa usa ka popular incumbent sitting president nga ang usa ka successor makabaton usab sa susamang approval gikan sa katawhan ilabi na sa electorate.
Ikaduhang punto de vista nagpunting sa subling pagkabanhaw sa init nga hisgotanang political dynasty, sa pagka-premature sa isyu sanglit anaa pa man sa unang tuig ang Duterte regime ug nga gikinahanglan usab una ang national exposure niadtong buot molunsad sa kandidatura ilabi na didto sa national level.
Hinoon, wala pay reaksyon nga nakuha ang mga tigbalita gikan sa batan-ong alkalde sa syudad sa Davao sa ninggula nga pamahayag giluwatan mismo sa presidente sa nasud-Pilipinas kun dawat ba niya kini nga scenario o dili.
RadyoMan June Duterte
