Davao City – Gibarogan ni Davao City Mayor Sara Duterte-Carpio nga dili tinuod ang alegasyong ‘campaign fundraising’ alang sa 2022 election.
Nakaabot sa Alkalde ang report nga adunay mga indibidwal nga nagapangayo og kwarta ngadto sa nagkalain-laing tao ug grupo lakip na sa mga negosyante, aron gamiton nga campaign fund sa pagdagan niini pagka presidente sa sunod tuig.
Matud ni Mayor Sara, wala kini pagtugot kaniya ug kini usa ka klase sa scam o pagpangilad, ug ang kwartang posibleng matigum niini magamit lamang sa personal nga interes sa mga tao nga anaa likod sa maong iligal nga aktibidad.
“Wala po itong pahintulot mula sa akin. Wag po kayong maniwala, wag po kayong magbigay. Ito po ay scam o uri ng panloloko. Magagamit lang ang perang malilikom sa fundraising na ito sa mga pansariling interes sa mga taong nasa likod nito,” pamahayag sa Alkalde.
Panawagan sa presidential daughter nga dili maghatag og kwarta sa maong transaksyon ug gilayong i-report sa pinakaduol nga police station ang nahisgutang insidente.
Una nang gibutyag ni Duterte-Carpio nga wala kini plano nga mudagan isip presidente ug bisan ang amahan niining si Presidente Rodrigo Duterte, nagpahinumdom kaniya nga dili mudagan pagka presidente sa Pilipinas.
RadyoMaN Kirby Manzon
