Davao City – Subling gipahinumdom ni Davao City Mayor Sara Duterte-Carpio ang pagbaton og ventilation sa mga sakyanan nga gihimo na nga mandatory subay sa direktiba gikan sa Land Transportation Franchising and Regulatory Board (LTFRB)-XI.
Matud sa alkalde nga adunay pagtuon ang health experts sa Harvard University nga dako’g epekto sa pagpaubos sa risgo sa pagtakod sa Coronavirus Disease 2019 (COVID-19) ang pagbaton og igong ventilation sa sakyanan.
“Kaniadto pa man nagasulti na pud ‘ta pabalik-balik ana nga ablihan gamay ang bintana para musulod ang hangin. So finally, sa pagkakaron we found this study and the Task Force COVID-19 of Davao City initiated a resolution padulong sa LTFRB nga himuong mandatory ang pag abli sa bintana sa mga airconditioned na PUVs,” segun sa Mayora.
Sa gipagula sa LTFRB-XI nga Office Circular No. 2020-59 nga pirmado ni Atty. Armand B. Dioso, LTFRB-XI Regional Director, mamahimong paandaron o kaha palongon ang air conditioning system apan kinahanglang abrihan ang tanang bintana sa sakyanan.
Ang among circular epektibo gilayon ug padayon nga valid panahon sa General Community Quarantine (GCQ) o Modified General Community Quarantine (MGCQ).
RadyoMaN Kirby Manzon
