Davao City – Gimandoan ni Davao City Mayor Sara Duterte-Carpio ang tanang barangay officials nga mao ang mga kapitan ug kagawad nga lingkuran ug magplano gilayon sa ikaduhang adlaw sa paglingkod sa ilang katungdanan sa umaabot nga bulan sa Hulyo.
Kini ang gipamahayag sa mayor atol sa gipahigayong oath taking ceremony kagahapong adlawa sa mga bag-ong napili nga Barangay ug SK officials sa dakbayan sa Davao nahitabo sa Davao City Recreation Center.
“Kinahanglan mag planning session ta diha sa atong barangay para ma-submit dayon kay ang budgeting sa September-October,” segun niini.
Dugang niini, gibutyag sa mayor nga tawgon nang “Purok” ang tanang sitio dinhi sa dakbayan.
Sumala niini, adunay pilion nga purok leader nga mamahimong representante sa ipahigayon nga eleksyon isip Purok Leader Federation President nga murepresentar sa 18th City Council.
Sa pikas bahin, gipasalamatan ni Mayor Sara Duterte-Carpio ang tanang mitambong sa maong mass oath taking lakip na ang City Mayor’s Office ug ang Local Government of Davao sa pag-organisar niining aktibidad.
RadyoMaN Jason Amisola
