Davao City – Gikonsidera ni Davao City Mayor Sara Duterte nga usa ka ‘premature’ nga lakang ang pagpatuman sa “No Vaccine, No Entry” policy sa Barangay Hall nga maoy giimplementar karon ni Kapitan Ursicio Ungab sa Barangay Calinan Proper, Davao City.
Gipasabot sa alkalde (sa interbyu sa city-owned radio) nga dili pa tanan mabakunahan gumikan sa limitadong supply sa Coronavirus Disease 2019 (COVID-19) vaccine rason nga ‘premature’ kun sayo pa kaayo kini nga ipatuman.
“Very premature siya (No Vaccine, No Entry) considering nga ang atong supply sa bakuna dili pa ingon ana ka daghan, therefore ang mga tao wala gyud silay opportunity nga magpabakuna because dili daghan ang atong available nga bakuna,” saysay sa mayor.
Gidugang ni Mayor Sara nga mamahimong magpatuman og ‘No Vaccine, No Entry’ policy sa Barangay Hall apan kinahanglan nga adunay online system aron padayong matagad ang concerns sa katawhan.
“Very premature nga mag-require ka og “No Vaccine, No Entry” dinha sa Barangay Hall unless you have a fully online system nga maka-cater sa mga tao kung duna silay kinahanglan sa inyuhang Barangay Hall,” dugang sa alkalde.
Apan giklaro ni Kapitan Ungab sa interbyu sa DXDC RMN Davao nga padayon gihapon nga ma-cater ang concerns sa publiko apan kini himuon sa gawas diin ginalista kung usab kung sila ba bakunado o wala pa nabakunahan batok COVID-19.
Nag-unang tumong usab niini nga maprotektahan ang mga personahe sa barangay.
“Temporary man gud ko naga opisina sa gym namo. Ma-cater gihapon sila pero didto sa gawas. Dili sila musulod kay wala may bakuna. Ma-cater ang problema nila, certification makuha gihapon pero kung magpahusay ka nga wala pay bakuna, dili gyud ko musugot diha. Adto mo maghusay sa gawas. Ang ilang gi-reason, ila mang katungod ang dili magpabakuna. Korek! Pero katungod pud nako as Punong Barangay pag-check sa ilaha kung kinsay walay bakuna,” pagpasabot ni Ungab.
Una niini, miani og managlahing reaksyon ang maong palisiya sa barangay partikular na niadtong wala pa nabakunahi o wala pa midesisyon nga magpabakuna batok COVID-19.
RadyoMaN Kirby Manzon
