Davao City – Bisan og dili pa hayag ang kahigayonan kung musalmot ba o dili sa 2022 presidential election si Davao City Mayor Sara Duterte-Carpio, nibatikos na ang Gabriela Partylist ngadto sa mga naglaraw nga mudagan sa mas taas pa nga posisyon sa nasud.
Wala man nganli ni Gabriela Partylist Representative Emie De Jesus si Mayor Inday sa iyang banat, apan alang kaniya ambisyoso ra kaayo kini aron mangandoy nga mangalagad ug mutuldok sa mga suliran sa nasud pinaagi sa pagkupot sa taas nga posisyon sa Pilipinas.
Gihagit ni De Jesus ang mga nangandoy nga mahimong presidente nga mupartisipar una sa pagsulbad sa mga nag- unang problema sama sa ekonomiya, politika ug uban pa ug dili kanang magpaharuhay ug magpaabot kanus-a muarangkada ang piniliay aron ingnon sa katawhan nga manluluwas sa gihambin nga kahigwaos sa mga botante maong mudagan kini sa 2022 presidential election.
Dili dautan ang maninguha sa posisyon sa pagka-presidente, apan kung aduna ma’y angay i-prayoridad ug unahon sa karon kana mao ang paghuman sa mga problema nga wala mahatagi og solusyon sa presenteng gobyerno ug dili kanang mag una-una og pagpadayag sa pulitikanhong interes bisan og layo pa ang adlaw sa bugnong lugaynon.
Wala palabya ni De Jesus ang paglampornas sa dagkung balud sa mga balay sa Barangay 22 ug ang pagbaha sa coastal barangays hatud sa monsoon waves Sabado sa buntag sa miaging semana nga alang kaniya maoy dapat unahon og tagad ni Mayor Inday ug dili ang laraw nga pagpuli sa gahum sa iyang amahan nga si Pres. Rodrigo Duterte.
Mibalibad ang militant lawmaker sa pagkumento kun maayo ba o dili alang sa usa ka demokratikong nasud sama sa Pilipinas nga ang musunod og gunit sa gahum ang anak ra usab ang apan lamang mao nga kun mao ra gihapon nga apeyildo ang magrenda sa nasudnong gobyerno, daw tataw na kaayo ang pagtukod og political dynasty sa Pilipinas sa maong pamilya.
RadyoMaN Joel Viray
