Davao City – Nagpabiling lig-on ang baroganan ni Davao City Mayor Sara Duterte-Carpio nga magpapili pag-usab pagka-alkalde sa syudad sa Davao luyo sa lunod-patay nga panawagan sa iyang mga supporter nga padaganon kini pagka presidente sa Pilipinas sa 2022 Elections.
Naminghoy ang supporters sa mayor human walay kisaw nga nahitabo sa katapusang adlaw sa filing sa Certificates of Candidacy (COC) kagahapong adlawa (October 8, 2021), human ang tanan nagpaabot sa giingong paglupad sa Agila.
Sa gipagawas nga pamahayag ni Mayor Sara sa iyang official Facebook page sa katapusang adlawa sa COC filing, mipadayag kini sa iyang walay undang nga pagpasalamat sa gihatag nga pagsalig ug respito sa daghanang Pilipino sa iyang kandidatura.
Giawhag usab sa alkalde ang tanan nga magtinabangay alang sa hapsay, ug way tikas nga eleksyon sa sunod tuig.
“I am presenting myself to the Dabawenyos as Mayor for the third and last time in my life as a politician. I call on everyone to work together for an honest, orderly, and credible elections in May 2022,” tipik sa statement sa mayor.
Bisan pa man niini, malaumon gihapon ang mga supporter ni Duterte-Carpio nga aduna pay milagrong mahitabo diin nasayrang ilawom sa Omnibus Election Code, mamahimo pang mag-withdraw ang nag-file og COC ug mamahimong ilisan sa iyang kapartido hangtud Nobyembre 15, 2021.
Susamang nahitabo kaniadto sa pag-withdraw ni Martin Diño pagka-presidente ug mi-substitute si Mayor Rodrigo Duterte nga midaug sa maong piniliay.
RadyoMaN Kirby Manzon
