Davao City- Giklaro karon ni Davao City Mayor Sara Duterte-Carpio nga adunay ‘working speed guns’ nga ginagamit karon ang City Transport and Traffic Management Office (CTTMO) aron disiplinahon ang mga malapasong drivers dinhi sa dakbayan sukwahi sa gi-alegar.
Sa usa ka media interview, gibatbat sa alkalde nga daw nakwestyon karon ang integridad sa CTTMO human gikatahong namahayag si Davao City Police Office–Traffic Group (DCPO-TG) Chief Ernesto Castillo nga walay magamit nga speed guns karon ang atong syudad.
Hangyo sa mayor ngadto sa maong opisyal nga kung mahimo, likayan ang paghisgot og isyu din madalahig ang laing opisina.
“Giignan nako si Director Tagum to tell him (Castillo) nga he should not speak for other offices, LTO, LTFRB, CTTMO. Kung gusto siya mag istorya about issues, he should limit the issues within his office because naay upat ka speed guns ang CTTMO nga working properly,” pagpatin-aw pa sa batan-ong mayor sa syudad sa Davao.
Kahinumduman nga gibutyag ni Castillo atol sa AFP PNP Press Conference nga karong mga panahona, wala silay record sa ilang buhatan nga mga drivers nga nadakpan sa speed limit regulation tungod kay guba ang ilang speed guns.
Gipaabot sa Traffic Group ang ilang gi-request nga mga speed guns gikan sa City Government of Davao.
RadyoMan Abi Bibera
