Davao City – Gitino karon ni Mayor Sara Duterte-Carpio nga ipailawom usa nila sa makuting deliberasyon ang mamahimong implikasyon sa mando ni Pres. Rodrigo Duterte nga ideklara ang New Peoples Army (NPA) nga usaka ‘terrorist organization.’
Sa usaka news conference, giklaro sa alkalde ning dakbayan nga hinay-hinay usa sila karon sa DC Peace sa gilaraw nga localized peacetalks sanglit ang pakig-istorya ngadto sa rebeldeng pundok malagmit magbutang kanila sa gitawag nga ‘sensitive and dangerous situation’ gumikan sa lagda sa Human Security Act.
Matud ni Duterte, dili lamang usa sila makig-koordinar sa rebel front inay didto na lamang una nila itumong ang ilang peace efforts ngadto sa pakigsandurot sa katawhan kun mga stakeholders sa mga komunidad diin anaa ang presensya sa mga rebeldeng hut-ong.
Sa susamang pakighinabi, gipadangat sa mayor ang iyang personal nga pangaliya nga mabatonan unta nato ang malinawong kapaskuhan taliwala sa kapakyas nga mamontar ang hinabing pangkalinaw.
RadyoMaN June Duterte
