Sarangani Province—Pormal nang miperma ug kasabutan tali sa MPBL kon mahalika basketball league ang usa sa lima ka pinakabag-ong team sa nasangpit nga liga nga mao ang Sarangani Province KAPA sa pagpanguna sa team owner niini nga si Pastor Joel Apolinario kauban ang MPBL Commissioner Kenneth Durremdes.
Sumala pa sa team owner niini nga miapil sila sa maong liga aron nga madevelop usab ang mga homegrown talent sa mga basketbolista sa Sarangani Province ug aron nga mahatagan sila ug tsansa nga makadula sa mas daku nga liga.
Sumala pa ni Pastor Joel Apolinario nga wala man usab kini nag expect nga gilayong maka sulod sa finals ang iyahang team tungod kay nagtuo kini nga daghan ug mas kusog nga team kaysa sa ilaha apan malaumon kini nga sa pagdagan sa panahon mas madevelop ang iyahang mga player ug makakuha ug kampyonato.
Gikabutyag usab ni Commissioner Kenneth Durremdes nga tungod kay bag-o nga team ang Sarangani dili gilayon nila kini hatagan ug sayo nga game schedule aron nga mahatagan sila ug panahon nga maka pangita ug maayu nga player.
Tungod kay sa karon matud pa nagkanihit na ang mga player nga mamahimong iharong sa nasangpit nga dula tungod sa kadaghan sa mga team nga niapil.
Pinaagi matud pa sa MPBL mahatagan ug tsansa ang ubang mga player nga maglisud ug sulod sa Pro League tungod kay dili ingon ka talentado ug kulang sa gintas-on apan sa MPBL mapakita matud pa nila ilahang talent. (Dave Silagan)
