Laing kalipay na usab ang ipa-ambit sa mga opisyales sa probinsya sa Sarangani tungod sa laing grasya nga nadawat gikan sa nasyonal nga gobyerno sa administrasyon ni Pangulong Rodrigo Duterte. Sa tibuok Rehiyon Dose, Sarangani Province lang ang makadawat sunod mga adlaw og duha (2) kabuok ambulansya nga kumpleto na sa kagamitan mukantidad matag usa og hapit P2.5 Milyon ka pesos.
Kagahapong adlawa, Martes, sa resolusyon nga giduso ni Board Member Jess BascuƱa, ang chairman sa komitiba sa panglawas, atol sa regular sesyon sa Sangguniang Panlalawigan, gitagaan og pagtugot si Governor Steve Chiongbian Solon nga pirmahan ang Deed of Donation tali sa Department of Health nga gi-representahan ni DOH Undersecretary Lilibeth David aron ma-deliber na ang maong duha ka ambulansya, ibutang kini sa Maitum Municipal Hospital og sa Maasim Municipal Hiospital.
Unang nihatag og tulo (3) kabuok ambulansya atong tuig 2017 ang PCSO kon Philippine Charity Sweepstakes Office kung diin mismong si kanhing PCSO General Manager Alexander Balutan ang naghatud niini sa Kapitolyo, og kini ang nagamit sa Kiamba Municipal Hospital, Glan Municipal Hospital og Malungon Municipal Hospital. Samtang ang laing duha (2) ka ambulansya nga gipalit nila Governor Solon ang gihatag pud sa Malungon Municipal Hospital og Maitum Municipal Hospital.
Og kini karong muabutay nga duha (2) ka ambulansya sa DOH ang idungag sa ambulansya nga pagagamiton sa Maitum Municipal Hospital og sa Maasim Municipal Hospital.
