Padayon ang pakig-anut sang Department of Labor and Employment (POEA) kag iban nga mga concerned agencies sa Kuwaiti government kasunod sang memorandum of agreement (MOA) para sa proteksyon sang mga overseas Filipino workers (OFW) sa nasambit nga pungsod.
Sa isa ka press conference subong nga adlaw didto sa Maynila, gindeklarar ni Labor secretary Silvestre Bello III ang mas ginpahugot nga tikang sang DOLE batuk sa mga illegal recruiters.
“We are bringing battle versus illegal recruitment to a higher level,” suno kay Bello.
Angut sini, ginkanselar na sang Philippine Overseas Employment Administration (POEA) ang lisensya sang mga private recruitment agencies nga may pending nga kaso, kasunod sang pag-resolbar sang iban sa mga ini.
“Pursuant to the directive of the secretary of Labor (Bello) to expedite cases of private recruitment agencies guilty or deploying OFW’s to Kuwait, POEA has finally resolved pending cases and we have the list of PRA’s (private recruitment agencies) found guilty of recruitment violations of their corresponding penalties,” suno kay Administrator Bernard Olalia.
Dugang pa ni Olalia, napasakaan naman sang kaso ang mga personnel sang iya opisina kasunod naman sang deployment sang mga indi kwalipikado nga mga ‘balik maggagawa’ ukon mga OFW nga nagbakasyon lang diri sa pungsod.
Naghinyo na ang Pilipinas sa gobyerno sang Kuwait nga diri pagahimuon ang negosasyon para sa bilatiral agreement, kun sa diin nga may pila ka mga probisyon nga gusto ma-istoryahan man sang Pilipinas.
Natalana nga magabyahe padulong Saudi Arabia kag Qatar ang mga opisyales sang labor department bwas, February 22, para masigurado ang seguridad sang mga OFWs didto. – RCSG/iFM News
