Davao City – Sayaw Kadayawan: Usa kini sa gikahinam-hinaman og maayo sa mga Dabawenyo atol sa tinuig nga selebrasyon mas popular na karon nga mao ang Kadayawan sa Davao.
Sa maong aktibidad, daghang mga dance groups ang nagtigi gikan sa nagkadaiyang eskwelahan o grupo sulod ug gawas sa syudad depende sa klase-klaseng kategoriya.
Sumala pa sa mga manggi-alamon, ang Sayaw Kadayawan usa ka artistikong sayaw sa giingong mga kuwentong-bayan, tradisyon ug cultural practices gikan sa onse ka mga lumadnong kaliwatan kansang orihinal nga gigikanan mao ang Davao Region.
Aduna hinoon kiniy kalahian sa Indak-Indak sa Kadayawan: Ang Sayaw Kadayawan ginahimo kini sa usa ka lugar lamang sagad ginapahigayon sa usa ka mall samtang ang Indak-Indak usa ka street dancing competition nga mas ginatutukan ang foot works.
Sa atong pakighinabi sa usa sa mga partisipante sa maong aktibidad nga si Alle Villacorta gikan sa grupong Sinagila Dance Arts Ensemble sa Jose Maria College, giawhag niini ang tanan nga adunay talento sa pagsayaw ilabi na sa cultural dances nga muapil isip usa sa mga pamaagi sa pagduyog sa Kadayawan.
“Kung naa moy talent especially sa cultural, dili maulaw o magduha-duha nga mag join sa mga grupong naga apil sa Sayaw Kadayawan. For me, the best ang cultural because naay gina-portray nga lain-laing tribes and ma-enhance ang skills and talent,” saysay ni Villacorta.
Karong tuiga, laing set na usab sa mga mananaug ang gideklara sa Sayaw Kadayawan diin aduna kiniy duha ka kategoriya: Ang Children’s Category ug Adult Category.
Sa Children’s Category, deklaradong kampeon ang Parang Central Elem. School Performing Arts Guild, 2nd Place ang Lapu-Lapu Elem. School samtang mientras 3rd Place mao ang Magallanes Elem. School Dance Ensemble.
Samtang sa Adult Category,Grand Slam ang Madayaw Cultural Ensemble human nga sunod-sunod nga nasakmit ang kampyonato sa tulo na katuig, gisundan kini sa Agro Industrial Foundation College of the Phils. samtang anaa sa 3rd Place ang Kathara Dance Theater Collective.
Matuod gayud nga daghang mga pamaagi sa pagpaila-ila sa mga kultura ug tradisyon sa napulo ug usa ka mga kaliwatan dinhi sa dakbayan sama pananglit sa pagkanta, drama, musika nga makita ug madungog sa usa ka aktibidad mas nailhan na karon nga mao ang… Sayaw Kadayawan!
RadyoMaN Renz Barbarona
