SCAM ALERT | Persona nga kapareho sang pangalan sang ‘pasimuno’ sang double your money scheme nga nagpangbiktima sa pila ka mga residente sang Barangay Libas, Roxas City, ginklaro ang iya pangalan!

21

Roxas City, Capiz – Hugot nga ginpanginwala sang persona nga nagahingalan kay ‘Josephine Ramos’ nga siya amo ang ginatumod nga ‘pasimuno’ sang double your money investment scheme nga nagpangbiktima sa pila ka mga residente sang Barangay Libas, Roxas City.
Sang ginpakig-angutan sang news team, ginpahayag ni Ramos- nga posible ka-pangalan gid lamang sini ang nasambitan nga ginpahayag ‘pasimuno’ sa investment scheme.
Aminado man si Josephine Ramos y Bernas nga nakibot ini sang may nagalab-ot sa iya sang impormasyon nga namensyunar ang iya pangalan nga amo ang puno-puno sang nasambitan nga investment scheme.
Bilang isa ka rerirado na nga indibidwal, membro sang Lupong Tagapamayapa sang Barangay Banica, Roxas City kag negosyante, nagapokus na lamang ini sa pila ka mga negosyo kag punongan.
Samtang sa ginpatigayon nga hearing sang nakaligad nga adlaw sang Sabado sa Barangay Hall sang Libas, Roxas City, ginpahayag sang up line nga si Anna Mae Barra nga nag-umpisa ang nasambitan nga investment scheme sang nakaligad nga bulan sang Hulyo.
Siya kag ang iya pamilya ang una nga nangin investor kun sa diin naka-pay out pa gani ini sa sulod sang napulo(10) ka adlaw.
Apang sang ulihi, wala na makontrol ang nagasulod nga kwarta matapos nga na-emgganyo naman ang pila ka mga residente sa nasambit nga lugar nga magkapital. Apang tubtob sa katapusan sang bulan sang Agosto, wala na sang may natabu nga pay-out sa mga investors nga ginpromisahan nga magadoble ang kwarta sa sulod sang kinse(15) ka adlaw.
Ginabanta nagalab-ot sa P30M ang nataban nga kantidad gikan sa mga nabiktima nga investors.

Facebook Comments