Sa interview sa DXDC RMN Davao kang ASU Head Simplicio Sagarino sa Straight to the Point Morning Edition kauban si RadyoMan June Duterte, iyang gibutyag nga bisag nikaylap karon ang mga pagpangilad aron makapangkwarta ilabi na pinaagi online sa tibuok nasud, maihap nalang ang nagadangop sa ilaha nga nakasinati og scam.
Apan iyang gipaklaro nga anaa gihapo’y mga reklamo nga muabot sa ilang buhatan nag-una na diha ang raw lots scam kun ang mga agricultural lots nga ginapamaligya isip residential subdivisions nga wala’y pagtugot gikan sa gobyerno nga makitang ginabaligya online ug matud pa pwede ra hulog-hulogan ang bayad matag bulan.
Maong sa kanunay pahinumdom ni Sagarino nga dili dayong mutoo ug magpadala sa kung unsa ma’y makita online ilabi na kung aduna na’y malambigit nga kwarta.
Ug sa mga aduna’y gusto ipaabot sa Davao City Anti-Scam Unit nga mga reklamo o mga dugang pangutana, mamahimong mubisita sa ilang opisina o manawag sa ilang hotline number [082] 225 – 6044 o sa mobile numbers nga 0928-296-2171 ug 0956-074-6942.
RadyoMan Ivy Parido
