Davao City – Kalingawan lamang sumala pa ang nahimong tumong sa gimugnang mga daw lubnganan sa mga investment schemes nga nahimo karong atraksyon sa usa ka bakanteng luna sa Brgy. Communal, Buhangin District, Davao City.
Sa interbyu sa DXDC RMN Davao kang Ernesto Caoily, usa sa naghimo sa ginatawag nga scammer cemetery, gibutyag niini nga trip lamang sumala pa ang maong mga lubnganan panahon sa Undas apan nakurat na lamang sila nga nag trending kini kun nag viral sa social media.
“Lingaw-lingaw ra unta ni amoa. Natingala mi nga na-trending man hinuon,” saysay ni Caoily.
Gibutyag ni Caoily nga gihimo kini alang sa mga nabiktima sa investment scams diin daghan sumala pa ang maka-relate. Mensahe sumala pa niini mao ang paglubong sa kalagot ug kasuko sa giingong mga willing victims.
“Daghan pud maka-relate ani nga tao kay daghan man pud kaayo na-scam. Sa amoa lang pud. Ilubong nato ang atong kalagot ug kasuko,” segun ni Caoily.
Kahinumduman nga gisugdan pagpakita sa publiko ang maong scam cemetery niadtong Oktubre 25 ug mulungtad ang maong atraksyon hangtud sa Nobyembre 2, 2019.
RadyoMaN Kirby Manzon
