Mandurriao, Iloilo City – Arestado si Noeme Pinuela, 50 anyos sang Q-Abeto , Mandurriao matapos ginserbihan sang warrant of arrest sa kaso nga estafa .
Nagtipon naman sa Mandurriao police station ang mga nabiktima ni Pinuela kon sa diin, kapin 15 milyones pesos ang nakuha sang suspek sa mga ini.
Suno kay alyas Ana , isa sa nabiktima ni Pinuela, gin-engganyo siya sang suspek nga mag-invest kon sa diin, 80% sang iya investment ang mabalik sa sulod lang sang apat ka semana.
Ginpahayag ni Ana nga nakilala niya si Pinuela bangud masami ini sa ila opisina nga nagaproseso sang mga dokumento bangud sekretarya ang suspek sang isa ka taxi company.
Aminado si Ana nga nagsalig siya kay Pinuela bangud maayo man kuno ang record sini kag miyembro sang isa ka charismatic group.
Suno kay Ana, nagsugod siya invest sang iya kwarta sang Enero 2018 kag iya man nakita nga maayo ang balik sang iya investment.
Bangud sini, amat-amat niya nga ginduganagan ang kantidad sang iya gina-invest tubtob naglab-ot na sa 450 mil pesos apang gulpi lang nag-untat ang payout kag madamo na lang sang balibad ang suspek.
Suno kay Ana, madamo sila nga natuntuhan ni Pinuela kag may iban pa nga naglab-ot sa isa ka milyon ka pesos ang ila na-invest.
Nagapanawagan karon ang mga biktima sa iban pa nga natuntuhan sang suspek nga magbuligay kag magpasaka sang kaso batok kay Pinuela agud maangkon ang hustisya.
Preso sa Mandurriao police station si Pinuela kag natalana nga magpyansa sang 18 mil pesos.
