BACOLOD CITY – Gin-aprubahan naman sang Local School Board sa syudad sang Bacolod nga magbutang sang nurse sa tanan nga mga eskwelahan sa elementary kag high school.
Suno sa chairman sang Committee on Education Councilor Renecito Novero nga para mahatagan sang nagaka-igo nga medical attention ang isa ka bata sa ti-on nga magla-in ang ila pamatyag, nag-decide ang local school board nga magbutang sang isa ka school nurse sa tanan nga mga eskwelahan sa Bacolod City.
Paathag pa ni Novero nga mangin JO ukon job order ang status sang mga nurses nga iga-assign sang mga public schools.
Dugang pa sang konsehal nga nagtaas man ang budget para sa Local School Board halin sa P150 million pesos, gindugangan naman ini sang P30 million bangud man sa pagtaas sang Real Property Tax sa diin may yara naman sang ‘share’ ang Special Education Fund (SEF). / RES Photo
