Davao City – Patay ang usa ka seaman human gituohan nga nalumos alas 4:50 sa hapon sa may shoreline atbang sa may Sta. Ana Wharf ning siyudad sa Davao.
Sa report gikan sa kapolisan Sta. Ana, naila ang biktima nga usa ka Arnufilo Deocampo Jr., 23 anyos, ulitawo, walay kumpletong address.
Matud pa sa kauban sa biktima nga seaman nga si Lyndonne Ramas, 23 anyos, nagpuyo sa Brgy. Dumingag, Zamboanga del Sur, samtang ang biktima nagdula sila og basketball sa ibabaw sa usa ka Everwin 5 Cargo Vessel ug aksidente nalabay ang bola sa dagat ug boluntaryo nga miambak ang biktima aron makuha ang maong bola.
Apan tungod sa kakusog sa current sa dagat ug kadagko sa mga balud, hinay-hinay og kaunlod ang lawas sa biktima ug girescue dayon sa usa ka Jose Loreto Bruce apan unconscious na niadtong tungora gani dali kining gidala sa Southern Philippines Medical Center (SPMC) aron matabang apan sa paghiling sa doktor gideklara ang biktima nga dead on arrival.
Sa karon ang patayng lawas ni Deocampo anaa na sa morgue sa SPMC ug ginasubay pa sa kapolisan kung asa ang kumpletong address sa maong biktima.
RadyoMaN Don Pulayao
