Gipasidunggan kagahapon ang usa ka kanhi seaman, isip usa ka bayani, atol sa inaugural session ug pagbaylo sa liderato sa Naawan, Misamis Oriental.
Gihatagan sa kagamhanang lokal sa Naawan og certificate of commendation ug cash nga 10,000 pesos si Rudyard Payusan, taga-Barangay Mat-i, chief mate kaniadto sa cargo ship nga LCT Crescent sa kumpanyang Golden Bridge Shipping, Inc.
Niadtong Oktubre 17, 2015, kapin 20 ka mga pasahero sa usa ka dakung motorized banca ang iyang naluwas, human kini ma-agian sa iyang gisakyang cargo ship, nga nalunod tunga-tunga sa kadagatan sa Cebu ug sa Camotes group of islands.
Mi-ambak sa dagat si Payusan, nga karon 52 anyos na, dala ang dakung pisi aron ihikot sa nalunod nga motorized banca ug mabira apil ang mga pasahero niini nga naana sa dagat, paduol ngadto sa cargo ship.
Apan nasapon sa nabulabod nga pisi ang iyang too’ng ti-il ug naputol, hinungdan sa iyang pagka-baldado ug pagka-undang sa trabaho.
Sa iyang inaugural speech, miingon si Mayor Dennis Roa nga gihatagan sa maong pasidungog si Payusan tungod sa heroic act o bayanihong lihok niini, nga maoy iyang bu-ot makit-an sa tanang mga taga-Naawan.
Bisan sa ginagmay’ng butang, sama sa pagsunod sa simple’ng ordinansa, usa na kini ka bayanihong lihok, matud pa ni Roa.
Mapasalamaton si Payusan sa gihatag nga pagsaludo kaniya sa LGU nga wala niya gilauman tungod kay upat naman ka tuig ang milabay human sa maong panghitabo. (RadyoMan Divina Suson)
