ILOILO City – Nagabaton na ang city population office sang nominations para sa search for The Outstanding Women of Iloilo City ukon TOWIL 2018.
Suno kay mayor Jose Espinosa III kabahin ini sang pagkilala sang syudad sang papel sang kababaihan sa sosyudad.
Magatakop ang submission sang nomination sa Pebrero 20.
Ang search bukas sa mga mga kababaihan nga legal ang edad kag nakahimo sang major impact ukon contribution kag nakahatag sang bugal kag dungog sa syudad sang Iloilo.
Dapat katapo ukon opisyal sya sang organisasyon ukon tawo nga nakahimo sang talalupangdon nga binuhatan sa iya patag nga nakabulig sa kaayuhan kag pagpataas sang estado sang kababehan kag nagapasanyog sang sosyudad nga nagakilala sang patas sa tanan.
May 15 ka service categories nga mahatagan sang padungog nga ginalakipan sang Judicial; Differently-Abled Persons; Protective; Religious; Professional; Academe; Volunteerism and Community; Culture and Arts; Math, Science and Technology; Business; Non-Government Organization or Civic Organization; Media; Government; Philanthropic Works; kag Sports.
Ini nga awards angut man sa nagahilapit nga women’s month sa bulan sang Marso. /// Photo via IMT
