Davao City – ‘Swill feeds’ o pagpakaon og lamaw o ‘infected pork products’ gikan sa mga Chinese o Indonesian vessels ang posibleng hinungdan sa pagkaylap sa African Swine Fever (ASF) virus dinhi sa Southern Mindanao.
Sa usaka news conference, gibutyag ni Deparment of Agriculture Sec. William Dar nga hugot nilang gipatuman karon ang mga contingency measures aron mapugngan ang dugang pagkuyanap sa ASF sa lain pang mga lugar nga kanait sa mga areas nga unang naka-rehistro og confirmed ASF cases.
Nasayran nga unang gikataho ang ASF cases sa Davao Occidental samtang nataptan usab ang mga baboy sa duha ka mga barangay sa Calinan District gisundan sa Sulop, Davao del Sur ug Koronadal.
Matud sa kalihim, anaa sa 10,000 ka mga baboy gipailawom sa ‘depopulation thru culling’ tungod sa African Swine Fever nga nilampornas sa Davao Region.
Dugang ni Dar, gi-andam na sa gobyerno ang alokasyon alang sa mga apektadong hog raisers sa rehiyon diin ilawom sa maong livelihood program, ang mga kwalipikadong aplikante makadawat og tag P30,000 ‘zero interest loan’ payable sa tulo ka tuig.
Gi-awhag usab sa opisyal ang mga benepisyaryo nga mobalhin na sa laing matang sa negosyo kun panginabuhi isip hulip sa pagpamuhi og baboy.
Sa pikas bahin, gisugilon ni Department of Agriculture (DA-XI) Regional Director Ricardo Oñate, Jr. nga nagpadayon gihapon ang ‘depopulation thru culling’ sa lungsod sa Don Marcelino ug Malita sa Davao Occidental ug sa Barangay Lamanan ug Dominga sa Calinan District, ning dakbayan.
RadyoMan Aimee Guinita
