Con un 67-año de edad security guard ya tira el pulis despues este ya man juramentao ya rebata el pusil del otro pulis na Tetuan Highway enantes aga.
Con el security guard ya conose como si Jimy Salacao, casao, nativo de Siocon, Zamboanga del Norte quien tiene el presente address na Cotabato City, guardia del Red Force Security Agency y designao na un hardware na Tetuan HIghway.
Asegun na report, off duty ya si Salacao y serca man alas 9 del aga cuando ya pasa si SPO1 Samir Sabuero, assigned na PRO9.
Ya habla si Sabuero ya man slowdown su motorsiclo porcausa con el condicion del tarffic cuando derepente ya atraca conele si Salacao y ya gala conel disuyu 9mm pistola na baina na su sintura.
Llevando con el pistola, ya entra otravez si Salacao na hardware donde le ta trabaja y ya man discutijan y su uban guardia.
Atiempo ya pasa tambien otro maga pulis del Special Action Force quien tamen encamino na PRO9 ya responde.
Ya precura pa maga pulis convinci con Salacao para man surrender pero ya hace ya este rebenta con el pistola.
Cuando ya sinti maga pulis delicao ya el pasada, unu diila ya tene ya que tira con Salacao por tres beses hasta ya tumba este na calsada.
Ya lleva con Salacao na hospital pero ya despidi este amediante el curada medical.
Asegun con maga uban di Salacao na trabajo, tiene este problema donde el deste anac ta manda bolbe conele na Cotabato porcausa tiene cosa ta hace gendeh bueno su esposa.
