Un security guard del un escuela publica quien ta man deligencia como un habal-habal driver cadavez noahy na duty, ya queda victima de matansa na Purok 6, Phase 3 na barrio de Lunzuran enantes aga.
Con el victima ya conose como si Marvin Piñero Balwig, 49, casao, del Pichel Security Agency y taman duty na Don Pablo Lorenzo Memorial High School na Sta. Maria y residente de Tetuan.
Con el cuerpo di Balwig ya recobri el un habal-habal driver serca alsa el sol y dayun ya reporta na otoridad.
Durante ta imbestiga el maga junto conel maga oficiales del barrio ta encabesa el capitan si Joel Jose, ya puede descubri que el victima ya sostene monton irida de lanciada.
Un baina cutchilyo hecho de carton ya puede tambien recobri na lugar del incidente.
Ya queda estraniable el situacion na lugar amediante el presencia del maga otoridad na lugar cuando ya puede columbra el maga pulis na calsada el XRM motorsiclo del victima mas de cien metro antede llega na lugar donde ya mata con Balwig.
Tiene tambien rastro de sangre ya puede nota el otoridad na cuantos parte del motorsiclo.
El helmet tambien del victima ya puede encontra distancia na motorsiclo.
Ta cre el maga pulis del mismo lang lugar el criminal.
Asegun con el esposa del victima si Jenelyn y anac si Marvin Jr., alas 7 del aga hasta alas 3 del tarde ayer ya man duty Marvin Sr. pero nohay mas este bolba na casa porcausa acustumbrao este ta man biaje como habal-habal cadavez nohay na duty.
Alas 3 del aga enantes cuando ta precura llama con Marvin Sr., pero serao ya deste cell phone hasta ya sabe sila muerto ya este.
Ta cre el maga otoridad pasajero solamente di Marvin quien conele ya mata y ya saca su dinero.
